காது கருவி எவ்வாறு செயல்படுகிறது ?

காது கருவியானது வெளிக்கருவி, உட்கருவி என இரண்டு வகையாக உள்ளது
காதுக்குப் பின்புறம் வெளியில் தெரிவதுபோல் பொருத்தப்படுவது வெளிக்கருவி ஆகும் . காது வெளிக்கருவியில் நுண் ஒலிவாங்கி (மைக்ரோபோன்), ஒலிபெருக்கி, ஒலியை உள்ளே அனுப்பும் அமைப்பு, மின்கலன் ஆகியவை உள்ளன.
காதிற்கு வெளியில் ஏற்படும் சத்தத்தை ,நுண் ஒலிவாங்கியானது பெற்று அந்த ஒலியை கிரகிக்கிறது . பின்னர் ஒலிபெருக்கி ஒலியின் அதிர்வுகளை அதிகப்படுத்தி, அதனை டிஜிட்டல் குறிகைகளாக மாற்றுகிறது.
இந்த டிஜிட்டல் குறிகைகள் ஓர் அலைபரப்புக் கருவியின் வழியாக காதின் உட்கருவிக்கு அனுப்பிவைக்கிறது.
காது உட்கருவியில் ஒலிவாங்கி, ஸ்டிமுலேட்டர் (Stimulater), காந்தம் ஆகியவை அடங்கியுள்ளன. இந்த காது உட்கருவியை அறுவை சிகிச்சையினால் காதின் பின்புறம் தோலுக்கு அடியில் பொருத்தி, அதனை தையல் போட்டு மூடிவிடுகின்றனர் .
காது உட்கருவியில் கம்பிபோல் இருக்கும் ஸ்டுமுலேட்டர் ஆனது உட்காதில் உள்ள நத்தை எலும்பில் (Cochlea) பொருத்தப்படுகிறது.பின்னர் அலைபரப்பி மூலம் வரும் ஒலிகளை, ஒலிவாங்கி கவர்ந்து ஸ்டுமுலேட்டருக்கு அனுப்பிவைக்கிறது.
பின்னர் ஸ்டுமுலேட்டரானது டிஜிட்டல் குறிகைகளை மின்குறிகைகளாக மாற்றி, செவி நரம்பு வழியாக மூளைக்கு அனுப்புகிறது. அங்கே ஒலிகள் பகுக்கப்பட்டு கேட்கும் திறன் செயலுக்கு வருகிறது.